Бүгүн, 6-октябрь күнү саат 8де КР Өкмөтүнүн Жалал-Абад облусундагы ыйгарым укуктуу өкүлчүлүгүндө активдин жыйыны болот. Анда Жогорку Кеңештин КСДП фракциясынын депутаты Сатыбалдиев Кыянбек Урмаматовичти өкмөттүн Жалал-Абад облусундагы өкүлү катары активке тааныштырышат.

Мурдагы өкмөттүн Жалал-Абад облусундагы өкүлү Жумагүл Эгамбердиева үстүбүздөгү жылдын 15-сентябрь күнү КР өкмөтүнө караштуу жергиликтүү өз алдынча башкаруу иштери жана этностор аралык мамилелер боюнча агенттигинин директору болуп дайындалган болчу. Ошондон бери бул бош кызмат орунга ким келээри табышмак болуп, ар кимди божомолдоп жатышкан.

Жаңы жооптуу кызматка дайындалып жаткан Өкмөттүн Жалал-Абад облусундагы ыйгарым укуктуу өкүлү Кыянбек Сатыбалдиев 1977-жылдын 28-апрелинде Майлуу-Суу шаарында туулган. Жогорку билимдүү. 1996-жылы «Майлуу-Суу электр-механикалык техникумун “техник-технолог» адистиги боюнча бүтүргөн. 2013-жылы Экономика жана ишкердик университетинин «бухгалтердик эсеп, анализ жана аудит» бөлүмүн аяктаган.

Эмгек жолун 2007-жылы «Ак-Жол-2000» фермердик чарбасында иштөөдөн баштаган. Ал эми 2007-2013-жылдар аралыгында «Ак-Жол-2000» фермердик чарбасынын коммерциялык директору болуп иштеген.

2013-2015-жылдары Майлуу-Суу шаарынын мэри болгон.

2015–жылы 4-октябрда Кыргызстан Социал-демократиялык партиясынын тизмеси боюнча VI чакырлыштагы Кыргыз Республикасынын Жогорку Кеңешинин депутаттыгына шайланган.

Үй-бүлөлүү, эки кыздын атасы.