Жалал-Абад шаарындагы Барпы атындагы драма театрында мугалимдердин кесиптик майрамы белгиленди. Бул тууралуу шаардык мэриянын басма сөз кызматы билдирди.

Алынган маалыматка караганда, ага  Жалал-Абад шаарынын мэри Салайдин Авазов, депутаттардын жергиликтүү кеңешинин төрагасы Эрнисбек Ормоков, Жалал-Абад шаардык билим берүү бөлүмүнүн башчысы Рысбек Калчаев жана шаардагы окуу жайлардын жана мектептердин мугалимдери катышышты. Алгач шаар мэри жана депутаттардын жергиликтүү кеңешинин төрагасы кесип ээлерин майрамдары менен куттуктап, алдыңкы мугалимдерге шаардык мэриянын ардак грамотасын тапшырышты.

- Мугалимдин жумушу өтө оор жана жоопкерчиликтүү. Сиздер биздин келечегибиз болгон жаштарды даярдап, аларга татыктуу билим берип, келечекке салым кошуп жатасыздар. Сиздердин өсүп келе жаткан муундарды тарбиялоодогу эмгегиңиздер баа жеткис, өлкөнүн келечеги сиздердин ишиңиздерден көз каранды,- деди шаар мэри С. Авазов.

Майрамдык салтанаттын экинчи бөлүгү  концерттик программа менен улантылды.