Варшавадагы ЕККУнун саммитинде эл аралык жана жергиликтүү укук коргоочулар Өзбекстандын жаңы бийлиги менен диалог куруп баштоо демилгеси менен чыгышты. Бирок аталган өлкөнүн расмий делегациясы алардын кайрылуусун көңүл сыртында калтырды.

ЕККУнун Варшавадагы жыйыны – бул адам укуктарынын абалын талкууга алган алгачкы ири конференция. Өзбекстандын расмий делегациясы ага өлкөдө бийлик алмашкандан кийин катышты. Мындай иш чараны өткөрүү менен укук коргоочулар өзбек өкмөтүн адам укуктарын коргоо жаатында диалогго барууга жана өлкөдө реформа жасоого үндөштү.

Бул арада Мирзиёев айрым артисттердин чоң сахнага кайтып келүүсүнө уруксат берди. Анын мындай демилгеси Өзбекстандагы социалдык саясаттын өзгөрүп баштаганынан кабар берет. Ага карабай, өзбек өкмөтүнүн жаңы жетекчилиги республикадагы адам укуктары темасын али көтөрө элек.