Бүгүн, 4-октябрда Ош шаарынын күнүнө карата шаардын “Жеңиш” сейил багында  “Ош шаарынын көз ирмемдери” аттуу сүрөт көргөзмөсү болуп өттү. Бул тууралуу шаардык мэриянын басма сөз кызматы билдирди.

Алынган маалыматка караганда, анда фото галлерея уюштурулуп, шаардын күнүмдүк турмушун, кооз жерлерин, ар кандай кесип ээлеринин образдарын чагылдырылган лайт-бокстар сейил бакка орнотулду. Сүрөт галлереясы менен шаар мэри Айтмамат Кадырбаев баштаган расмий өкүлдөр, шаар тургундары жана студенттер таанышты.

Андан соң, шаар жаштарынын “Сүйүктүү Ош шаарым” аттуу акциясы болду. Акциянын жүрүшүндө, шаардын, чет өлкөнүн студенттери Ош шаарын даңазалап ырдап, кыргыз бийин бийлешти. Алыскы Индиядан, Пакистандан келген студенттер кара жорго, жалындуу кыргыз бийин бийлешсе, башка улуттун студенттери кыргызча манас айтышып, патриоттук ырларды ырдашты.

Калаа башчысы А.Кадырбаев, Ош шаарынын жаштары  өздөрүнүн ынтымактыгы, достугу, биримдүүлүгү жана активдүүлүгү менен башка аймактын жаштарынан өзгөчөлөнүп тургандыгын белгилеп, бардык жаштарды шаарды, мамлекетибизди сүйүүгө, патриоттуулукка дагы бир жолу үндөдү.

Айта кетсек, жаштардын шаар күнүн майрамдоосу, кечинде дискокече менен уланат.