Түркиянын өкмөт башчысынын орун басары Куртулмуштун 2-октябрдагы билдирүүсүнө караганда, президент Режеп Тайип Эрдогандын катышуусунда өткөн өкмөт жыйынында өлкөдө өзгөчө кырдаалды 19-октябрдан тарта дагы 90 күнгө узартуу чечими кабыл алынды.

Түркияда өзгөчө кырдаал 15-июлдагы төңкөрүш аракетинен беш күндөн кийин 20-июлда киргизилген. Төңкөрүш аракети учурунда 270 киши набыт болгон.

Расмий Анкара АКШда жашаган диниятчы Фетхуллах Гүленди төңкөрүштүн уюштуруучусу катары айыптап келет. Гүлен аны четке каккан. Төңкөрүш аракети боюнча 32 миңдин тегерегинде киши камакка алынганын түрк бийлик өкүлү кабарлаган.