“Ош-Тазалык” ишканасынын жетекчиси баш болгон кызматкерлер, Ош шаарынын вице-мэри жана жана тартип сакчылары менен биргеликте кечинде атайын рейд уюштурду. Рейддин алкагында жол боюна таштанды төгүп, шаарды булгагандар кармалды. Алар негизинен жер үйлөрдүн тургундары. Бул тууралуу шаардык мэриянын басма сөз кызматы билдирди.

“Жер үйлөр үчүн атайын сигнал ыкмасында машина келип, үйлөрдүн жанына таштанды чогултуп кетет. Бирок, аны күтпөстөн айрымдар чоң жолдун боюна мүшөктөргө, баштыктарга салынган акыр-чикирлерди алып чыгып ташташат. Шаардын борбордук көчөлөрү тазаланган боюнча турганы менен айрым жерлеринде турган таштандылар шаардын көркүн эле кетирбестен, калаа жашоочуларына да жагымсыз жагдайды жаратат. Жолго жакын турган үйлөрдүн жашоочулары болсо башкаларга шылтап кутулат. Мындан улам, биз тартип сакчылары, мэрия өкүлдөрү менен бирге чыгып, түшүндүрүү иштерин жүргүздүк. Таштанды төккөндөр боюнча протокол түзүлүп, шаардык мэриянын алдындагы административдик комиссияга жөнөтүлдү”-, деди мекеме жетекчиси Талант Капаров. 

“Үч саатка созулган түнкү рейдде мүмкүн эмес жерге акыр-чикирлерди төгүп жаткан жараандар аныкталып, алардын алтоо администртивдик айыпка жыгылды. Ош-Тазалык ишканасынын жетекчиси кошумчалагандай шаардын тазалыгы үчүн мындай рейддер ай сайын өткөрүлүп турат”, - деп билдирет Ош шаардык мэриясынын басма сөз кызматы.