Жалал-Абад шаарында Бүткүл дүйнөлүк жүрөк күнүнө карата дарыгерлер тарабынан акция өткөрүлдү. Дарыгерлер бардык эмгек жамааттарында буга чейин эле түшүндүрү иштери жүргүзүп келишти. Бул тууралу үй-бүлөлүк дарыгерлер борборунун директорунун орун басары Гүлнара Маматалиева билдирди.

Анын айтымында, Бүткүл дүйнөлүк жүрөк күнү 1999-жылдын 29-сентярында  өткөрүлүү менен жүрөк ооруларынын алдын алуу максатын көздөп келет. Бул багытта Жалал-Абад шаарынын жер-жерлеринде атайын жүрөк боюнча пунктар ачылган. Ал жерде шаар тургундары өзүнүн кан басымын текшертишип, ден-соолугуна кам көрүп келе жатышат.

- Айта кетсек, жүрөк-кантамыр менен ооруган адамдарга сапатту жардам көрсөтүлүп жаткандыгы боюнча мониторинг жүргүзүлгөн. Инсульт формасынан жабыркагандар 2015-жылы 2 оорулуу болсо, 2016-жылдын 8 айында бизде катталган жок. Ал эми инфарктка былтыр 2 оорулуу дуушар болсо, быйыл 1 оорулуу чалдыккан. Албетте, бул биз үчүн чоң жетишкендик десем болот, - дейт ал.

Эскерте кетсек, жүрөк-кан тамыр дартынан каза болгон адамдардын саны жагынан Кыргызстан алдыңкы он өлкөлөрдүн катарына кирет. Статистикалык маалыматтарга ылайык, ар жылы республикада жүрөк оорудан 18 миң чамалуу адам каза болсо, дүйнө жүзүндө жылына жүрөк дартынан 17,5 миллион адам көз жумат.