Украинанын тышкы иштер министри Павел Климкин «Нормандия төрттүгүнүн» ТИМ башчыларынын Берлиндеги жолугушуусунда Орусия менен орток пикирге келишпегендигин билдирди. Донбасста шайлоо өткөрүү - талкууга алынган негизги маселелердин бири болчу.

Климкиндин айтымында, Орусия шайлоо мыйзамдары боюнча өз вариантын сунуштаган. «Биз украин мыйзамдарын өзүбүз эле даярдап алабыз, бизге эч кандай кеңештердин кереги жок”, - деп баса белгиледи ал. Ошондой эле расмий Киев үчүн Донбасстагы жергиликтүү шайлоону жетектөө принципиалдуу маселе экендигин кошумчалады.

Орусиянын тышкы иштер министри Сергей Лавров болсо бир катар шарт аткарылмайын Донбасста шайлоо өткөрүү мүмкүн эместигин билдирди. Анын пикиринде, шайлоо жөнүндөгү мыйзамды Донецк жана Луганск менен макулдашып, кабыл алуу зарыл. «Ошондой эле мунапыссыз эч кандай шайлоо болушу мүмкүн эмес”, - деди С.Лавров.

Берлиндеги жолугушуунун алдында германиялык министр Франк-Вальтер Штайнмайер Украинанын чыгышында жергиликтүү шайлоону өткөрүү жөнүндө келишимди илгерилеткенге аракет кыла тургандыгын билдирген. Өзгөчө бул жикчилдер көзөмөлдөгөн райондорго тиешелүү. Бул иш Евробиримдиктин Москвага каршы июлдун аягына чейин киргизген санкцияларынын мөөнөтү аягына чыга электе аткарылышы керек.

Штайнмайер айткандай, ок атышпоо жөнүндө Минск келишимин ишке ашыруу жараяны, шайлоого байланыштуу саясий маселелерди чечүү иши “үлүлдүн кадамындай” ылдамдыкта илгерилеп жатат.