Жалал-Абад шаарынын жергиликтүү бийликтери Эл аралык карыялар күнүнө карата башталган бир айлык акциянын алкагында шаардагы карыяларга азык-түлүк баштыкчаларын таркатышты. Бул тууралуу шаардын вице-мэри Турдалы Темирбаев билдирди.

Анын айтымында, шаар мэриясы 15-сентябрдан 15-октябрга чейин карыяларга көңүл буруунун бир айлыгын жарыялаган. Ушул бир айлык акциянын алкагында шаар мэриясынын биринчи вице-мэри Таирбек Чойбеков, шаардык кеңештин төрагасы Эрнисбек Ормоков баштаган шаардык ишканалардын жетекчилери шаардагы карыяларга азык-түлүк баштыкчаларын таркатышты.

- Баары болуп үйүнөн сыртка чыга албаган 76 карыяларыбыздын кабар алдык, аларды келе жаткан эл аралык майрамы менен куттуктап, азык-түлүк баштыктарын тапшырдык. Алар, албетте, буга кубанышып, ыраазылыктарын билдиришти. Биз муну менен эле чектелип калган жокпуз. Бардык ишканаларда, жамааттарда бир айлык акция боюнча иш-чаралар пландары белгиленген, ошол боюнча иштер жүрүп жатат, - дейт Т. Темирбаев.

Эске сала кетсек, эртең жергиликтүү бийликтер Жалал-Абад шаарындагы 124 карыяга сый тамак берип, кеңири программадагы концерт тартуулашат.