Жалал-Абад шаарында шаардык билим берүү башкармалыгы тарабынан мугалимдер күнүнө карата даярдыктар көрүлүп жатат. Мугалимдердин кесиптик майрамы зор салтанатта жана кеңири аншлаг менен өтмөкчү. Бул тууралу шаардык билим берүү башкармалыгынын профсоюз комитетинин төрайымы Зулфия Тургунбаева билдирди.

Анын айтымында, бул майрамга карата шаардык билим берүү башкармалыгы тарабынан 65 миң сом акча каражаты каралган.

- Бул майрамга шаардык билим берүү башкармалыгы Барпы атындагы драма театрында чоң салтанатта майрам өткөрмөкчү. Бул салтанаттуу иш-чарага жергиликтүү бийликтин, коомчулуктун өкүлдөрү да катышат. Майрамда мыкты эмгектенген мугалимдерге жергиликтүү бийликтердин, шаардык билим берүү башкармалыгынын Ардак баракчалар, төш белгилер, балуу сыйлыктар тапшырылат. Андан соң, мугалимдерге концерттик программа тартууланат, - дейт ал.

Эскерте кетсек, жергиликтүү бийликтер мугалимдерге коммуналдык төлөмдөр үчүн колдоо иретинде ай сайын 300 сомдон, жылына бир жолу кесиптик майрамы менен куттуктап 2 миң сомдон таркатып келет. Ал эми жыл сайын өткөрүлүүчү “Жыл мугалими” сынагынын жеңүүчүлөрүнө сыйлык катары 130 миң сом каражат берилет.