Жалал-Абад шаарындагы №14 Сатыбалды Давлетов атындагы инновациялык мектеп-лицейинде физика жана математика мектеби ачылуу алдында турат.Бул мектеп ачылган соң ушул предметтер окуучуларга тереңдетилип окутула баштайт. Бул тууралуу мектептин окуу тарбия-иштер боюнча директорунун орун басары Мырзайым Каратаева билдирди.

Анын айтымында, былтыркы 2015-2016-окуу жылында  билим берүү министири Элвира Сариеванын мугалимдер менен жолугушуусу болуп, анда Жалал-Абад шаарында физика жана математика мектебин ачуу туурасында маселе козголгон. Эми ошол айтылгандар ишке ашып жатат.

- Министирлик тарабынан шаарда биздин мектеп тандалып алынып,  бизге атайын буйрук келди. Буйруктун негизинде физика жана математика мектеби учурда ачылуу алдында турат. Быйыл 18-августтан 20-августка чейин министирлик тараптан биздин мугалимдерге ушул предметтер боюнча атайын окуутулар жүргүзүлдү. Биз учурда аталган  сабактарынан жаңы окуу жылына окуу планын түзүп, окуучулардан экзамен алып, эки класс түзүлдү. Министирлик тарабынан окуучуларга тереңдетип сабак берүүнү баштоо боюнча уруксат берилсе, 1-октябрда мектеп ишке кирет деген ойдобуз, -дейт ал.

Эскерте кетсек,  С.Давлетов атындагы инновациялык мектеп-лицейинде учурда 1868 окуучу окуса, аларга 92 мугалим билим берип келе жатат.