Ноокен районундагы Кочкор-Ата шаарынын Луговая  участкасында милициянын аймактык пункту менен фельшердик-акушердик пунктунун курулушу башталды. Бул тууралуу Жалал-Абад ОИИБнын басма сөз кызматы билдирди.

Алынган маалыматка караганда, курулуштун алгачкы пайдубалын курууга  Жалал-Абад ОИИБнын башчысы Ж.Жоробеков, шаар мэри К. Эгембердиев, Ноокен РИИБнүн башчысы Н. Өсөров, ОИИБнын ардагерлер кеңешинин төрагасы К.Исаков жана жергиликтүү тургундар катышты.

Курулуштун башталышында Жалал-Абад ОИИБнын башчысы Ж.Жоробеков  жыш жашаган калк арасында кылмыштуулукту алдын алууда,  элдин коопсуздугун, тынчтыгын, бейпилдигин сактоодо жана  бейтап жарандардын, кары-картаң ата-энелердин саламаттыгын  алдын алууга милиция жана ак халатчан кызматкерлери биргелешип эл менен иштешүүгө  жакшы шарт түзүлөрүн айтып өттү. 

Мындагы ашар жолу менен башталып жаткан курулуш иштин башталышына алгач жетекчилер фундаментин түптөлүшүнө өздөрү биринчилерден болуп  капсуласын  коюшуп, ишти баштап беришти.

Ал эми шаар мэринин айтысуу боюнча, имаратты куруу үчүн  мэрия тарабынан 1 млн 900 сом бөлүнгөн жана тендер жарыяланып, ага 3 фирма катышып, жыйынтыгында “Асуэнда” ЖЧКу  фирмасы утуп алган. Ал эми имарат толугу менен 2 айда бүтөт.

Ушундай жакшы саамалыкта жүрүп жаткан курулуш иштерине ыраазы болгон  аймактык тургундар, аксакалдар курулуп жаткан имаратка салым кошкон жетекчилерге жана курулушчуларга иштерине ийгилик,  күч кубат, талыкпас эмгек каалап, ак батасын беришти.