Жалал-Абад шаарында уйгур диаспорасынын “Иттипак” коому кеңири программадагы ынтымак иш-чарасын өткөрдү. Бул тууралу “Иттипак” коомунун түштүк аймагы боюнча жетекчиси Розжан Курбанов билдирди.

Шаардын “Элайнур” эс алуу комплексинде өткөн бул иш-чарага жергиликтүү бийликтердин, ар кайсы этникалык топтордун, коомдук уюмдардын, массалык маалымат каражаттарынын өкүлдөрү чакырылып, анда негизинен коомдук туруктуулук, өз ара достук жана ынтымакташтык тууралуу кеп жүрдү.

- “2016-жыл – Тарых жана маданият жылы” деп белгиленгени баарыбызга маалым. Ушул жылы биз да мамлекетке, анын туруктуулугуна жана бейпилдигине өз салымыбызды кошуу иретинде бул иш-чараны өткөрдүк. Кыргызстанда 80ден ашык улут жашайт, дал ошол улуттар аралык мамилелерди чыңдоо, биримдикте, ынтымактыкта жашоо – баарынан маанилүү нерсе. Бул иш-чара Жалал-Абад шаарында биринчи жолу өткөрүлүп жатат. Буга чейин Бишкекте республикалык деңгээлде өтчү, - дейт Р. Курбанов.

Бул ынтымак иш-чарасына Оштон, Бишкектен, Баткенден, ошондой эле ар кайсы райондордон коноктор келишкен. Жергиликтүү бийликтен Өкмөттүн облустагы өкүлүнүн биринчи орун басары Мамасалы Акматов, Жалал-Абад шаарынын вице-мэри Таирбек Чойбеков катышты.

“Иттипак” коомунун өкүлдөрү мындай пайдалуу иш-чараларды дагы да өткөрүп туруу зарылдыгын белгилешти.