25-сентябрь күнү алынган ыкчам маалыматтардын негизинде Сузак районунун  Бек-Абад жана Кургак-Кол айылында жашаган “Хизбут-Тахрир” экстремисттик уюмунун активдүү мүчөлөрүнүн (2 үйгө) үйлөрүнө  соттун санкциясы менен тинтүү иштери жүргүзүлдү. Бул тууралуу Жалал-Абад ОИИБнын басма сөз кызматы билдирди.

Алынган маалыматка караганда, тинтүү операциясын КР 10-Башкы башкармалыгы жана Жалал-Абад ОИИБ, Сузак РИИБнүн өздүк курамдарынан куралган атайын ыкчам топ тарабынан жүргүзүлдү. Эрте менен жүргүзүлгөн тинтүүгө үй-ээлеринен сырткары жакын кошуналары, айыл аксакалдары күбө болуп турушту. Алгач, тергөөчүлөр тарабынан үй ээлерине жашырылган мыйзамсыз буюмдарды өз эрки менен алып чыгып берүүнү өтүнүштү.

Бирок эки үйдүн тең ээлери мыйзамсыз андай буюмдар жок экенин билдиришкен. Үй ичин дыкаттык менен карап чыкканда жашырылган диний багыттагы китеп, баракчалар, дептерлер чыкты. Кошумча шек жараткан 5 даана ДВД диск, компютер жана башка буюмдар алынып экспертизага жиберилди. Теологиялык-экспертизанын корутундусу далил буюмдарды “мыйзамсыз”  деп аныктаса, кылмыш иши козголот.

Буга чейин да Жалал-Абад облусунун баардык аймактарында мындай тинтүү, түшүндүрүү иштери жүргүзүлүп келген. Анын натыйжасында 15 атуул учурда өз эрки менен экстремисттик бул уюмдан чыккан. Акыркы учурда Ноокен районунда да “Хизбут-Тахрир”  уюмдан чыккандардын саны арбып баратат.