Жалал-Абаддагы балдардын психоневрологиялык социалдык-стационардык мекемеси мындан ары медициналык тез жардамга муктаж болбойт. Анткени аталган мекемеде бүгүн алгачкы медициналык тез жардам көрсөтүүчү бөлмө ачылды. Бул тууралуу шаардык мэриянын басма сөз кызматы билдирди.

Алынган маалыматка караганда, бул мекемедеги тарбияланып жаткан балдарга медициналык тез жардам көрсөтүүнүн шарттары жаратылды. Аталган мекемеге КР Эмгек жана социалдык өнүктүрүү министри Кудайберген Базарбаев өзү келип, бөлүмдүн ачылуу аземине күбө болуп, меморандумга кол койду.

- Биздин балдарыбыз мындай бөлүмгө аябай муктаж болчу. Анткени бизде мүмкүнчүлүгү чектелген балдар тарбиялангандыктан, ар кайсы убакта ооруп калышат. Ошондуктан, биз тынымсыз медициналык тез жардамды чакырып турууга муктаж болчубуз. Мына бүгүн балдарга биринчи жардамды көрсөтүү мүмкүнчүлүгүнө ээ болуп олтурабыз. Бөлүмгө тийиштүү аппараттардын баары алып келинди. Келечекте бул бөлүм Жалал-Абад облусунун элине кызмат кыла турган болуп кеңейтилет, - дейт мекеменин жетекчиси.

Ошондой эле, министр мекемедеги абал, жаратылган шарттар менен таанышып, мыдан ары да балдарга жакшы шарттарды түзүү маселеси боюнча мекеменин кызматкерлери менен баарлашты.