Жалал-Абад облустук Барпы атындагы драма театрынын кезектеги 25-сезону “Курманбек баатырдын эрдиктери” аттуу спектаклден үзүндү көрсөтүү менен ачылды. Бул тууралуу Барпы атындагы драма театрынын көркөм жетекчиси, Кыргыз Республикасынын маданиятына эмгек сиңирген ишмер Талант Апиев билдирди.

Алгач ачылуу аземинин алкагында Барпы театрынын жана облустук Токтосун Тыныбеков атындагы филармониянын отузга жакын актёру тарабынан көрүүчүлөргө бир катар сахналаштырылган чыгармалар көрсөтүлдү. Ачылуу аземине Өкмөттүн Жалал-Абад облусу боюнча өкүлүнүн орун басары Бактыбек Анаркулов жана Жалал-Абад шаардык кеңешинин төрагасы Эрнисбек Ормоков катышты.

Андан тышкары, кыргыздардын нукура кыз узатуу каада салттары жана соңунда Токтосун Тыныбеков атындагы филармониянын чыгармачыл жамаатынын эмгеги менен даярдалган этно-концерт көрсөтүлдү.

- Ошентип, бул жылы биздин театрга, дегеле облуска ийгилик алып келген чыгармалар менен ачалы деген максатта бул чыгармаларды коюп жатабыз. Эми жаңы сезондун ачылышынан кийин театрдын актёрлору тарабынан даярдалган башка спектаклдерди да көрүүчүлөргө тартуулайбыз, - дейт  Т. Апиев.

Эскерте кетсек,  “Курманбек баатырдын эрдиктери” аттуу спектакли экинчи дүйнөлүк көчмөндөр оюндарында баш байгени жеңип келген.