Аннексияланган Крымдын аймагында Орусиянын парламенттик шайлоосу өткөндүгүнө байланыштуу Украинада өлкөнүн аймактык бүтүндүгү жана кол тийбестиги боюнча кылмыш иши козголду.

Буга чейин Украинанын Жогорку Радасы Мамлекеттик думага болгон шайлоону мыйзамсыз деп таануу чечимин кабыл алган. Тиешелүү токтом долбоорун украин парламентине «Элдик фронт» партиясы дүйшөмбү күнү сунуштаган. Анда эл аралык коомчулукту Орусиянын шайлоолору боюнча украин позициясын колдоого чакырышкан.

Күн мурун Украинанын тышкы иштер министрлиги Крымдын аймагындагы шайлоону айыптаган билдирүү тараткан. Украинанын аймагында Орусиянын Мамдумасын шайлоо боюнча тилкелерди ачуу эл аралык укуктардын фундаменталдык ченемдери менен принциптерин одоно бузуу болуп саналат, деп айтылат ал билдирүүдө.

Жарым арал аймагындагы Мамлекеттик думага шайлоону Кошмо штаттар менен Европа биримдиги да тааныган жок.

Крым Орусия тарабынан 2014-жылы аннексияланган. Украина менен эл аралык коомчулук Крымдын Орусияга кошулушун тааныбайт жана жарым аралды Украинанын аймагы катары эсептейт.