ЖалалАбад шаарында өспүрүмдөр арасында кылмыштуулук былтыркы жылга салыштырмалуу 3 пайызга азайды. Бул тууралуу Жалал-Абад шаардык ички иштер бөлүмүнүн жашы жетпеген өспүрүмдөр инспексиясынын башчысынын убактылуу милдетин аткаруучу Асан Аттокуров билдирди.

Анын айтымында, 2016-жылдын 7 айынын жыйынтыгы менен өспүрүмдөр арасындагы кылмыштуулук саны 10 болуп, бул өткөн жылдын ушул мезгилине салыштырмалуу салыштырмалуу 3 кылмышка аз.

- Өспүрүмдөр арасында кылмыштуулукту болтурбоо жана алдын алуу, баңгликке, аракечтикке каршы күрөшүү боюнча шаар аймагында жайгашкан орто мектептерде 401 жолу лекция жана чогулуштар өткөрүлүп, профилактикалык иш-чаралар жүргүзүлдү. Жалал-Абад шаары боюнча жаш өспүрүмдөр менен иштөө инспекциясынын кызматкерлери менен шаар мэриясы, коомчулук менен биргеликте 8 жолу ар кандай аталыштагы рейддер өткөрүлдү. Жыйынтыгында  171 жаш өспүрүмдөр кармалып, топтолгон материалдар Жалал-Абад шаардык жаш өспүрүмдөрдүн ишин кароо комиссиясына жана ата-энесинин же аларды алмаштыруучу адамдардын иштеген жерлерине, ошондой эле аймактык башкарууларга  маалымат катары жөнөтүлгөн. Азыркы учурда  бардык орто мектептерде жаш өспүрүмдөр инспекциясынын кабинеттери ачылып, окуучуларды жана мугалимдерди, ата-энелер комитетинин өкүлдөрүн кабыл алып, иштеп жатышат, - дейт ал.

Эскерте кетсек, Жала-Абад шаардык ички иштер бөлүмүнүн жашы жетпеген өспүрүмдөр инспекциясында учурда шаар боюнча 7 кызматкер эмгектенип келет. 

kogart.kg