Өзбекстанда президенттик шайлоо 4-декабрга белгиленди. Бул тууралуу өлкөнүн Борбордук шайлоо комиссиясынын төрагасы Мирза-Улугбек Абдусаломов билдирди.

Президентик шайлоого талапкерлердин арызын кабыл алуу 30-сентябрда башталып, 20-октябрда аяктайт.

Өзбекстандын парламент палаталарынын 8-сентябрдагы жыйынында президенттин милдеттерин убактылуу аткаруучу болуп премьер-министр Шавкат Мирзиёев дайындалган. Өлкөнүн Конституциясына ылайык, учурдагы президент өз милдеттерин аткара албай калган учурда анын ыйгарым укуктары парламенттин жогорку палатасынын төрагасына жүктөлөт. Бирок сенаттын төрагасы Нигматилла Юлдашев тажрыйбасы жоктугун билдирип, президенттин милдетин аткаруучу кызматка Мирзиёевдин талапкерлигин сунуштаган.

Өзбекстанды 27 жыл башкарган өлкөнүн биринчи президенти Ислам Каримов 78 жашында дүйнө салып, Самаркандда жерге берилген. Каримовду акыркы сапарга узатуу зыйнатын уюштуруу боюнча мамлекеттик комиссияны Мирзиёев жетектеген.