Түркиянын Ван шаарындагы жардыруудан жараат алгандардын саны 48ге жетти. Эки адамдын абалы абдан оор деп бааланууда. Буга чейин 11 адамдын жаракат алганы кабарланган. Жардыруу дүйшөмбү күнү эртең менен болгон.

ММКлар жардыруучу зат салынган унаа бийликтеги Адилеттүүлүк жана өнүгүү партиясынын аймактык кеңсесинин жанында жарылганын кабарлашууда. Жарылуу болгон жерден алыс эмес аймакта полиция бөлүмү да жайгашкан. Жараат алгандардын арасында эки полиция офицери бар.

Азырынча кол салуунун артында кимдин турары белгисиз. Бир нече күн мурда Түркия бийлиги басымдуу бөлүгүн күрт улутундагылар түзгөн 28 район башчысын жумуштан алган. Ага аткаминерлердин Күрдистан жумушчулар партиясына байланышы бар деп шектелгени себеп болгон. Аталган партия Анкара менен айрым Батыш өлкөлөрүндө террордук уюм деп эсептелет.

Түрк бийлигинин кадрдык чечими күрт калкынын арасында нааразылыктарды жараткан.

Акыркы айларда Түркиянын түштүк-чыгышында жардыруулар байма-бай болууда. Өлкө бийлиги алар үчүн жоопкерчиликти Күрдистан жумушчулар партиясына жүктөп келет.