Түндүк Корея өз тарыхындагы бешинчи ядролук бомбаны сыноодон өткөргөнүн жарыялады. Мамлекеттик маалымат каражаттары бүгүн, 9-сентябрда өлкөнүн түндүгүндөгү полигондон ядролук программа тарыхындагы эң ири бомба тесттен өткөрүлгөнүн расмий кабарлады.

Буга чейинки төрт сыноо да ошол Пангири деп аталган аймакта жүргүзүлгөн. Бүгүн ал жерде күчү 5,3 баллга жеткен сейсмикалык активдүүлүк байкалды.

Жума күнү болгон сыноонун кубаттуулугу — 10 килотонна, бул мурдагы жардырууларга салыштырмалуу эки эсеге көп. Хиросиманы жок кылган атомдук бомбанын кубаттуулугу 15 килотоннага барабар болгон.

Түштүк Корея Пангириде бүгүн буга чейин болуп көрбөгөндөй катуу жарылуу катталганын билдирди. Расмий Сеул жана Токио муну "кооптуу жана олуттуу чагым" деп атады. Кошмо Штаттар оор кесепет болушу ыктымалдыгын эскертти.

АКШ менен Жапония Түндүк Кореянын жээгине өз учактарын чалгындоого жөнөттү. Алар абаны жана жарылуу болгон жерге жакын аймактардагы радиациянын деңгээлин текшеришет.