Тажикстандын Ички иштер министрлиги 21 жаштагы Бободжонов Фирдавс менен 33 жаштагы Халилов Зоир учурда «Ислам мамлекети» террордук уюмунун катарында жүргөндүктөрүн билдирди.

ИИМдин маалыматы боюнча алар азыр издөөдө жана Кыргызстанда алардын атына жазылган паспорттордун кантип чоочун адамдарда болуп калганы белгисиз.

«Бишкектеги теракт «Али» деген каймана атка ээ Сотибоев Иззатилло аттуу Кыргызстандын жараны тарабынан жасалган. Анын колунда ИМдин мүчөсү, Тажикстандын Фирдавс Бободжанов деген жаранынын паспорту болгон», — деп жазылган билдирүүдө.

Маалымдалгандай, ушул жылдын майында Фирдавс Бободжоновдун Сирияда экендиги аныкталып, ага каршы чет өлкөдөгү согуштук аракеттерге катышкандыгы үчүн кылмыш иши козголгон. Тажикстандын укук коргоо органдары Фирдавс Бободжонов менен Зоир Халиловду издөө иштери уланып жатканын билдирүүдө.

6-сентябрда Кыргызстандын атайын кызматы Кытай элчилигинде теракт уюштургандардын тек-жайы аныкталганын билдирген. Алардын бири уйгур тектүү адам экени, Зоир Залиловдун атына жазылган тажик паспортун алып жүргөнү кабарланган. Ал Түркистан ислам кыймылынын мүчөсү болуп, «Жабхат ан Нусра» тобуна байланышкан Сириядагы уйгур террорчул кыймылынын буйрутмасы менен теракт жасаганы айтылган.