Өлкөнүн Тышкы иштер министрлиги Түркмөнстанда аткезчилик менен кармалган жарандын элчиликте иштегенин тастыктады. Ал Кыргызстандын Ашхабаддагы элчилигинде техникалык кызматкер болуп эмгектенген.

Буга чейин түркмөн маалымат каражаттары 17-апрелде “Фарап” өткөрүү пунктунда 36 жаштагы Манас Осмонов аттуу Кыргызстандын дипломатиялык өкүлчүлүгүнүн кызматкери автоунаасы менен Түркмөнстанга кирип келатканда ири контрабандалык тамеки менен кармалганын жазышкан.

Соңку маалыматтарга караганда, ал ошол күнү дипмиссиянын башчысынын уруксатысыз өзүнүн автоунаасы менен өлкөдөн чыгып кеткен. 20-апрелде Тышкы иштер министрлигинин буйругу менен Кыргызстандын Эмгек кодексинин негизинде кызматтан бошотулган.