Жалал-Абад шаарындагы №1 Михаил Бабкин атындагы мектеп-гимназиясында бүгүн 1-сентябрь билим күнү белгиленип, окуучуларды жана педагогикалык жамаатты Жалал-Абад шаардык мэриясынын аппарат жетекчиси Барчынбек Жантөрөев, Өкмөттүн Жалал-Абад областындагы ыйгарым укуктуу өкүлү Жумагүл Эгамбердиева, шаардык билим берүү бөлүмүнүн башчысы Ырысбек Калчаев баштаган жетекчилер куттукташты.

Жалал-Абад шаардык мэриясынын аппарат жетекчиси Барчынбек Жантөрөев бүгүнкү 1-сентябрь билим күнү менен окуучуларды жана мугалимдерди куттуктоо менен аларга окуудагы ийгиликтерди каалады.

-Урматтуу окуучулар,мугалимдер! Бүгүнкү жаңы окуу жылынын башталышы - Билим күнү менен баарыңыздарды шаардын мэринин жана жеке өзүмдүн атыман кызуу куттуктаймын. Сиздердин мектебиңиздер шаардагы эң алдыңкы мектеп болуп келе жатат, муну баарыбыз билебиз. Бул мектептин окуучулары  облустук, республикалык олимпиадаларда алдыңкы орундарды ээлеп келишет. Мектебиңиздерде мындан ары да ийгиликтер көп болсун. Жакшы окуңуздар. Бүгүнкү майрамыңыздар кут болсун! - деди Б.Жантөрөев.

Эскерте кетсек, быйылкы жаңы окуу жылында Жалал-Абад шаарында 24 мектеп иштеп жатат. Ал  мектептерге жалпысынан жаңы 3000 окуучу кабыл алынды.