Италия суучулдары тарабынан Ливиядан 20 чакырым алыстыктагы деңиз жээгинен алты жарым миңге жакын мигрант куткарылды. Эритрей менен Сомалиден чыккан качкындар адамга толгон жеңил кайыктар менен Европаны көздөй багыт алышкан.

Мигранттарды куткаруу операцияларына Италиянын деңиз жээгиндеги күзөтчү кемелери менен катар эле БУУнун гуманитардык миссиясынын катерлери да катышты. Associated Press агенттиги качкындар деңизге атайылап чыгышкан деп эсептеген миссия өкүлдөрүнүн билдирүүлөрүн жазды.

Алар жеңил кайыктар менен Ливиядан Италияга жетүү мүмкүн эмес экенин билишет, ошондуктан деңизге чыкканда куткаруучулар келерин билишкен, деп белгиледи агенттик.

Эл аралык миграция уюмунун маалыматы боюнча быйыл жалпысынан 105 миң мигрант Жер ортолук деңиз аркылуу Италияга жеткен, дагы 2 миң 700дөйү жээкке жетпей мерт болушкан.