Жалал-Абад шаарында экинчи асма көпүрө курулуп бүткөрүлүү алдында турат. Ал шаардын борбордук Ленин көчөсүндөгү унаа тыгындарын жоюп, жол кыймылынын коопсуздугун бекемдейт. Бул тууралуу шаар мэриясынан тийиштүү бөлүмдүн жетекчиси Миргүл Эгемова билдирди.

Анын айтымында, 2015-жылы Ленин көчөсүнүн борбордук бөлүгүндө унаа тыгындарын жана жөө атуулдардын башаламан кыймылын жөнгө салуу үчүн ушул көчөгө асма көпүрө курулган. Ошону менен шаардын борбордук бөлүгүндөгү көйгөй чечилген. Бирок, унаа тыгындары Ленин көчөсүнүн “Береке” базары бөлүгүндө пайда болуп, дагы жаңы көйгөй жаралган. Шаар бийликтери ал жерге да асма көпүрө курууну пландаштырышкан.

- Бул долбоорго шаардын бюджетинен 5 миллион 500 миң сом каралган. Азыркы учурда көпүрөнүн негизги каркастары жасалып, аны кураштыруу иши башталды. Буюрса, жакынкы убактарда шаардагы бул экинчи асма көпүрө пайдаланууга берилет, - дейт ал.

Эскерте кетсек, жыл башында шаар мэриясы калк арасында атайын сурамжылоо өткөрүп, шаардыктар асма көпүрө куруу зарылдыгын белгилешкен жана аны кайсы жерге куруу жагын да көрсөтүшкөн.