Ош улуттук драма театрында мугалимдердин Август конференциясы болуп өттү. Бул тууралуу шаардык мэриянын басма сөз кызматы билдирди.

Алынган маалыматка караганда, ага Ош шаарынын мэри Айтмамат Кадырбаев, шаардык кеңештин төрагасы Жапарбек Ормонов, шаардагы билим берүү тармагынын кызматкерлери, ардагер жана жаш мугалимдер катышты. Иш-чаранын жүрүшүндө жаш адистерди кабыл алуу аземи болду. Анда ардагер мугалимдер насаат сөздөрүн айтышып, жаш адистер ант беришти.

Калаа башчысы жалпы катышуучуларды жаңы окуу жылы менен куттуктап, сөз сүйлөдү.

“Билим берүү системасынын негизги өзөгү болгон билим сапаты жана мектеп окуучуларына татыктуу тарбия берүү  мугалимдердин гана эмес баарыбыздын милдетибиз. Жалпы билим берүүчү мектептердин педагогикалык кадрларга муктаждыгы анча сезилбегени менен жетишсиздик бар экендигин белгилөөгө болот. Жаңы окуу жылына карата 214 мугалимге заявка берилген болсо, 106 адис ишке кабыл алынды”,-деди А.Кадырбаев.   

Ошондой эле, жаңы окуу жылына жолдомо алышкан 106 жаш адистин ичинен, атайын критерийлердин негизинде тандалып алынган  20 адиске А.Кадырбаев баалуу белек катары заманбап үлгүдөгү планшеттерди тапшырды.