2016-жылга карата жарандык коргонуунун даярдык планынын негизинде Жалал-Абад шаарынын  мэринин буйругу кабыл алынган. Ошол пландын негизинде 23-24-август күндөрү Жалал-Абад шаардык жарандык коргонуу кызматтары менен командалык штабдык машыгуу өткөрүлүүдө. Бул тууралуу КР Өзгөчө кырдаалдар министрлигинин Жалал-Абад шаардык бөлүмүнүн башчысы, улук лейтенант Исхар Апиев билдирди.

Анын айтымында, 2016-жылга карата жарандык коргонуунун даярдык планынын негизинде Жалал-Абад шаарынын  мэринин буйругу кабыл алынган. Машыгууга Жалал-Абад шаардык жарандык коргонуу кызматтары, мекеме-ишканалардын башкаруу жана өздүк курамы атайын техникалар менен катышууда.

Машыгуунун экинчи бөлүгүндө Жалал-Абад шаарынын Шопоков көчөсүнүн №40 көп кабаттуу турак үйүнүн дубалдарынан кооптуу жаракалар пайда болгонуна байланыштуу, жашоочуларды Жалал-Абад мамлекеттик университетинин №1 жатаканасына көчүрүп чыгаруу чаралары аткарылды. Машыгуу учурунда жабыркаган жарандарга шаардык жарандык коргонуу жана тийиштүү башка кызматтар жардам көрсөтүшүүдө.

- Мындай машыгууларды өткөрүүнүн негизги максаты – өзгөчө кырдаал учурунда калкка ыкчам кызмат көрсөтүү менен шаардык жарандык коргонуу кызматтарынын иш-милдеттерин аткаруунун деңгээлин жогорулатуу болуп саналат, - дейт И. Апиев.