Казакстандын Улуттук коопсуздук комитетинин басма сөз кызматы Алматы облусунда өлкө аймагында бир канча теракт жасоону пландап жаткан радикалдык топтун мүчөлөрү кармалганын билдирди. Алар Казакстан менен Кыргызстандын жарандары.

"Топтун кармалган мүчөлөрүнүн жашаган жерлери менен атайын жашыруу жайларынан жардыруучу заттарды колго жасоо үчүн керектүү болгон заттар жана диний экстремисттик материалдар табылды", – деп жазылган 22-августта таратылган билдирүүдө.

"Радикалдардын УКК, полиция жана аскер бөлүктөрүнүн бөлүмдөрү менен кызматкерлерине куралдуу кол салуу боюнча пландары ачыкталды. Алардын кийинки кадамдарында адамдар көп чогулган жерлерде террористтик чабуулдарды жасоо каралган", – деп белгиленген билдирүүдө.

5-июнда Орусиянын чек арасына жакын жайгашкан Актөбө шаарында курал-жарак саткан дүкөндөр менен аскер бөлүгүнө кол салуу болгон. ИИМдин маалыматы боюнча кол салууга 27 киши катышкан. Анда 20 киши каза таап, 13ү кол салгандар болушкан. Андан сырткары 38 киши жаракат алган, алардын көбү аскер кызматкерлери. Бийлик ал кол салууну теракт деп атаган.

Актөбөдөгү окуядан кийин Казакстанда террор коркунучунун «сары» чеги киргизилген.