Бишкек шаарында 9-11-август күндөрү өрткө каршы мамлекеттик кызматынын түзүлгөндүгүнүн 90 жылдыгына арналган өрт-куткаруу колдонмо спорту боюнча республикалык мелдеште Жалал-Абад облустук өрткө каршы мамлекеттик кызмат башкармалыгынын курама командасы башка облустарынан барган 9 команданын арасынан шамдагайлыгын көрсөтүп, байгелүү орундарды ээлеген.

Бул тууралуу маалыматты Жалла-Абад шаардык өрткө каршы мамлекеттик кызмат бөлүмүнүн башчысы Аманбай Курманалиев билдирди. Анын айтымында, күжүрмөн эстафета боюнча рекорддун көрсөткүчү 42, 060 секунд болуп келген  болсо, биздин кызматкерлер 41, 024 секунд менен рекорд түрүн жаңылоого жетишишип, биринчи орунга чыгышты.

Мелдештин негизги максаты, өрт өчүрүүчүлөрдүн кесиптик жана күжүрмөн даярдыгын жогорулатуу болуп саналат.

“Ал эми 100 метрлик тоскоолдуктардан өтүү түрү боюнча үчүнчү, илме шаты менен окуу-машыктырма мунарасынын 4- кабатынын терезесине чыгуу түрү боюнча төртүнчү, үч муунактуу шаты менен окуу-машыктырма мунарасынын 3-кабатынын терезесине чыгуу боюнча төртүнчү орунду ээлөө менен жалпы командалык эсепте байгелүү экинчи орунга татыктуу болушуп, жыйынтыгында 15 миң сом акчалай сыйлык жана кубок менен сыйланышты. Мындай мелдештер жыл сайын өткөрүлүп келет”, -дейт ал.