Орусия Кыргызстандан Жогорку Нарын каскадын курууга кеткен 37 миллион долларды кайтарууну талап кылды. Буга жооп кылып, Улуттук энергохолдинг эл аралык көз карандысыз аудиттин жыйынтыгы чыккандан кийин “Кыргызстан кеткен акчаны төлөп берүүгө даяр” экенин өзүнүн расмий сайтына жарыялады.

Кыргызстан менен Орусиянын ортосундагы Жогорку Нарын каскадын жана Камбар-Ата-1 ГЭСин куруу боюнча макулдашуу расмий түрдө 9-августта күчүн жоготту. Буга байланыштуу Орусия Жогорку Нарындагы жолдорду түздөөгө жана жумушчулардын жатаканасына чыгымдалды деп эсептеген 37 миллион доллар чыгымын кайтарууну талап кылды. Бул макулдашууга 2012-жылы кол коюлган болчу. Бирок курулуш кечеңдегендиктен кыргыз тарап быйыл жыл башында ал макулдашууну жокко чыгарган. Анан убактылуу депутаттык комиссия курулушка кеткен чыгымды иликтеп чыгып, анын 3-4 эсе ашыкча көрсөтүлгөнүн таап чыккан. Кыргыз тарап муну эл аралык аудит аркылуу тастыктатып, анын негизинде кеткен чыгымды төлөп берерин билдирди.

Убактылуу депутаттык комиссиянын төрагасы Алманбет Шыкмаматов бул иште көп акча желип кеткенин Орусияга далилдеп берүү керектигин айтат. “Силер биринчиден келишимге кол коюп туруп, аны аткарбай койдуңар, экинчиден башында которгон акчаңардын жарымын эле кайра өзүңөрдүн адамдар алып кетиптир” деп айтып коюшубуз абзел. Орусия башында бизге тил эмизип, “ГЭСтерди куруп беребиз” деп, анан Өзбекстан менен сүйлөшүп алгандан кийин каржылоону токтотконун тарых үчүн белгилеп коюш керек”-деп кошумчалады ал.

Өкмөт Орусиянын кеткен чыгымын бюджеттен төлөп берүү, курулган объектинин баасына жараша ага үлүш сунуштоо же болбосо инвестордун эсебинен акчаны кайтаруу сыяктуу варианттар боюнча бир чечимге келе элек.