Түркия прокуратурасы өлкөдөгү ишке ашпай калган мамлекеттик төңкөрүштү уюштурган деп айыпталып жаткан Фетуллах Гүленди эки жолу өмүр бою эркинен ажыратып, кошумча дагы 1900 жылга соттоону талап кылды.

Айыптоо корутундусунда Гүлен «конституциялык түзүлүштү күч менен жок кылууга», «куралчан террордук топ түзүүгө» аракет кылган деген сыяктуу бир канча пункттар көрсөтүлгөн. Андан сырткары ал иш боюнча дагы 111 киши айыпталуучу катары өтүүдө, алардын үчөөсү тергөө аяктаганга чейин камакка алынгандар.

«Гүлендин террорчул уюмунун» мүчөлөрү (бийлик Гүлендин тарапташтарын ушундай деп атайт) бийликти басып алуу үчүн мамлекеттик мекемелерге кирип иштешкен деп айыпталышкан. Тергөөнүн версиясы боюнча, Гүлендин тобу төңкөрүш үчүн фонддорду, жеке мектептерди, студенттик жатаканаларды, ММКларды жана камсыздандыруу компанияларын пайдаланган. Андан сырткары диний ишмердин тарапташтары жалган компаниялардын жардамы менен АКШга акча жөнөтүшкөн.

Гүлендин иши козголоң аракетине чейин эле, өткөн жылдын сентябрында Түркиянын батышындагы Ушак провинциясында каралган жана ал топтун каржы операцияларын иликтөөгө байланыштуу болгон.

Түркияда аскердик төңкөрүш жасоо аракети 16-июлга караган түнү болгон. Анын эртеси өлкө президенти Реджеп Тайып Эрдоган козголоң чыгарууга Гүленди айыптаган — ал 1999-жылдан бери АКШда жашап жүргөн оппозициячыл маанайдагы диний ишмер. Андан кийин козголоң уюштуруу айыбы боюнча жалпысынан 10 миңге жакын киши кармалган.