Эми Жалал-Абад мэриясы менен Россия-Кыргыз Өнүктүрүү Фондусу өз ара кызматташтыкты чыңдай беришмекчи. Бул тууралуу эки тараптуу кызматташуу боюнча өз ара меморандумга кол коюу учурунда белгилүү болду.

Жалал-Абад шаарынын мэриясынын кичи жыйындар залында Жалал-Абад шаарынын мэри Салайдин Авазов жана Россия-Кыргыз Өнүктүрүү Фондусунун башкармасынын жетекчисинин орун басары Владимир Некрасов эки тараптуу кызматташуу боюнча меморандумга кол коюшту. Бул иш-чарага шаардык мэриянын, коомчулуктун жана аталган Фонддун өкүлдөрү катышты.

Жалал-Абад шаарынын мэри бул эки тараптуу кызматташуу шаар үчүн өзүнүн жемишин берерин, азыртан эле ар кандай өнүктүрүү долбоорлору Фондго берилип жатканын билдирди.

Ал эми Фонддун өкүлү В. Некрасов аймактардан ар кандай долбоорлор түшүп жатканын, алардын саны 415ке жетип, анын ичиенен 74 долбоор Жалал-Абад облусунун аймагына тиешелүү экенин билдирди. Ошондой эле ал каржылоодогу үстөк пайыздарынын төмөндөтүлүп, 4 пайызга түшкөнүн, ал эми Жалал-Абад шаарынын ишкерлери, бийликтери Фонд менен кызматташууда активдүүлүктү көрсөтүп жатышканын баса белгилеп кетти.

- Биз кызыктуу, аймактарды өнүктүрүүчү олуттуу долбоорлорду каржылоого даярбыз. Бизге сунуш-талаптар көп түшүп жатат, анын ичинен Жалал-Абад аймагынан да көп. Мунун өзү аймактагы ишкердиктин активдүү экендигин белгилеп турат, - деди В. Некрасов.

Бул иш-чарага катышкандар Фонддун өкүлүнө бир катар суроолор менен кайрылышып, тийиштүү жоопторду алышты.

Эскерте кетсек, Кыргызстандын жана Россиянын өкмөттөрүнүн ортосундагы бул Фондду түзүү боюнча келишимге 2014-жылдын 24-ноябрында кол коюлган. Ал эми Фонддун ачылышы 2015-жылдын 5-ноябрында жүз берген. Бүгүнкү күнгө карата 118 миллион долларлык нарктагы 333 долбоор жактырылган.