Жалал-Абад шаардык кеңешинде өткөн кезексиз сессияда негизги маселеден тышкары депутаттар айрым объекттерге жаңы ысымдарды ыйгарышты. Бул тууралуу шаардык кеңештин аппаратынан билдиришти.

Алынган маалыматка караганда, бүгүн Жалал-Абад шаардык кеңешинин кезексиз сессиясы болуп, анда негизинен участкалык шайлоо комиссияларынын курамын бекитүү талкууланды. Андан соң, депутаттар шаардагы айрым объекттерге жаңы ысымдарды ыйгаруу маселесин талкуулашты.

Имараты жаңыдан курулуп жаткан №6 орто мектебине мурда шаарда көп жыл иштеп, билим берүү тармагына эмгеги сиңген маркум Чырмаш Доороновдун, №19 орто мектебине Ыманалы Сатыбаевдин ысымы ыйгарылды. Мындан сырткары,  “Достук”, Чыңгыз Айтматов, Тайгараев аймактык башкармалыктарындагы бир катар көчөлөргө да жаңы ысымдар ыйгарылды.

Талкуу учурунда депутаттар арасында бул маселеде кызуу талаш-тартыштар пайда болуп, өз ара кайым-айтышууларга чейин барышты. Ал эми кезексиз сессиянын жыйынын шаардык кеңештин төрагасы эс алууда болгондуктан, анын орун басарлары алып барышты.