Жалал-Абад шаарынынын жаштары  “Жалал-Абад жаштары - көчмөндөр оюндарын колдойбуз” атту акциясын өткөрүштү. Бул тууралуу Жалал-Абад шаарынын мериясынын алдындагы жаштар иштер боюнча комитетинин төрагасы Байышбек Ташбаев билдирди.

Анын айтымында, алдыда күтүлүп жаткан II Бүткүл дүйнөлүк көчмөндөр оюну өлкөбүздө улуттук жана улуттар аралык биримдикти, туруктуулукту жана бейпилдикти бекемдей алат. Ошондуктан, Жалал-Абад шаарынын жаштары бул эл аралык маанилүү иш-чарага зор маани берип жатышат.

- Кыргызстандын келечеги, анын кандай болушу - ынтымактыкта, достукта. Коомдун өнүгүшү үчүн негизинен ушулар керек. Биз жалалабаддык жаштар каада-салттарыбызды, улуттук баалуулуктарыбызды сактап калууну колдоо менен бирге калаабыздын жаштары, жаштар уюмдары менен биргеликте Көчмөндөр оюндарына барып катышуучуларга дем-күч берүү ниетинде акция өткөрдүк. Акциянын алкагында атайын ролик тартып, социалдык тармактарга жайылтмакчыбыз, - дейт ал.