Жалал-Абад шаарынын бийликтери шаар аймагында туризм тармагын күчөтүү жана шаар имиджин жакшыртуу аркылуу инвестицияларды тартып келүүнү арттыруу боюнча комплекстүү чараларды күчөтүшмөкчү. Буга карата шаар мэриясында туризмди өнүктүрүү боюнча координциялык кеңеш  түзүлдү. Бул тууралуу шаардык мэриянын басма сөз кызматы билдирди.

Алынган маалыматка караганда, координациялык кеңеш 16 кишиден туруп, ага тиешелүү мекеме-ишканалардын жетекчилери, мэриянын жооптуу кызматкерлери, коомчулуктун өкүлдөрү кирген жана аны шаар мэринин биринчи орун басары жетектейт. Ошондой эле туризмди өнүктүрүү боюнча координациялык кеңештин Жобосу кабыл алынып, ал мэриянын токтому менен бекитилди.

Шаар мэриясынын социалдык өнүктүрүү бөлүмүнүн башчысы Гулина Базаркулованын айтымында, шаарда туризмди өнүктүрүүнүн резервдери көп.

- Жалал-Абад шаары - өлкөнүн аймагында да, чет жакта да кызыгууну туудурган таанымал аймак. Шаарда чет жактарга таанымал санаторий жайгашкан. Акыркы кездерде туристтик инфраструктуралар чыңдалып баратат. Эгер биз ушул тармакты жакшылап колго алсак, шаардын экономикасын, маданиятын кыйла өнүктүрүп алат элек,  - дейт ал.

Эми түзүлгөн координациялык кеңештин мүчөлөрү бул тармакты өнүктүрүүнүн ийкемдүү долбоорлорун жана багыттарын иштеп чыгууга сунуштарды даярдоо максатында аракет кылышмакчы.