Нью-Йоркто имамдын өлтүрүлүшүнө нааразы болгон ондогон адамдар ишемби күнү кечинде мечит алдына топтолушту. BBC тараткан кабарга ылайык, алар коомдо мусулмандарды жек көрүү күчөгөндүктөн улам ушундай кылмыш жасалганын билдиришти.

New York Daily News басылмасы чогулгандар АКШда исламды жек көрүүчүлүктүн күчөшүнө Республикалык партиядан АКШ президенттигине талапкер Дональд Трампты айыптап жаткандыктарын жазып чыкты. Ал шайлоо алдындагы жолугушууларында антиисламчыл көз карашын ачык айтып, мусулмандардын өлкөгө кирүүсүнө убактылуу тыюу салууну сунуштаган. Анын бул пикири коомчулук арасында сынга кабылган.

13-августта калаанын Куинс районунда 65 жаштагы имамды жана анын жардамчысын мечиттин алдында атып кетишкен. Полиция кылмышкерлердин мындай аракетинин себептерин жана окуянын чоо-жайын тактап жатат. Тергөөчүлөр кылмышты уурулукка аракет кылган бейбаштар жасаган болушу мүмкүндүгүн жокко чыгарышкан жок.